Enn ein stjóraskiptin í aðsigi

Framtíð knattspyrnustjórans Quique Sanchez Flores hangir á bláþræði eftir að lið hans Watford tapaði enn einum leiknum í ensku úrvalsdeildinni í knattspyrnu í gær.

Watford situr á botninum og tapaði 2:1 gegn Southampton í mikilvægum fallslag í gær en þetta var fimmta tap liðsins í tíu leikjum undir stjórn Flores sem tók við liðinu í september eftir að Javi Gracia var látinn fara.

Forráðamenn félagsins hafa verið að funda um framtíð stjórans um helgina og gætu þeir jafnvel tekið ákvörðun í dag en það er Sky Sports sem greinir frá þessu. Fari svo að Flores verði látin fara verða þetta tíundu stjóraskipti Watford frá því að Pozzo-fjölskyldan eignaðist félagið í júní 2012.

Þetta er í annað sinn sem Flores stýrir liði Watford en hann hætti sem stjóri Wat­ford árið 2016 eft­ir eitt tíma­bil í úr­vals­deild­inni. Liðið hafnaði í 13. sæti og komst í undanúr­slit ensku bik­ar­keppn­inn­ar en Spán­verj­inn geðþekki hætti þegar hon­um og for­ráðamönn­um fé­lags­ins kom ekki sam­an um ár­ang­ur fé­lags­ins.

• Blogga um frétt