Dele Alli, leikmaður Tottenham Hotspur og enska landsliðsins í knattspyrnu, hefur beðist afsökunar á að hafa gert grín að kórónuveirunni sem nú herjar á Kína og hefur valdið mörgum dauðsföllum þar, ásamt því að breiðast til annarra landa.
Alli birti myndskeið á samskiptamiðlinum Snapchat þar sem hann gerði grín að veirunni en hann hefur nú fjarlægt það og skrifað eftirfarandi í staðinn:
„Hæ, þetta er Dele. Ég vildi bara biðjast afsökunar á myndskeiðinu sem ég setti á Snapchat í gær. Þetta var ekki fyndið, ég áttaði mig strax á því og fjarlægði það. Þetta var sjálfum mér til minnkunar og ég brást félagi mínu með þessu.“