Manchester United og Chelsea tryggðu sér 3. og 4. sæti í ensku úrvalsdeildinni í knattspyrnu í lokaumferðinni sem fór fram í dag. Þá féllu Bournemouth og Watford úr deildinni en þau fara niður ásamt Norwich.
Manchester United heimsótti Leicester á King Power-leikvanginn þar sem liðin mættust í eiginlegum úrslitaleik um meistaradeildarsæti. Gestunum dugði jafntefli en heimamenn þurftu að vinna. Það var svo United sem tók forystuna á 71. mínútu eftir að Jonny Evans braut á Anthony Martial inni í vítateig og Bruno Fernandes skoraði úr vítaspyrnunni. Evans fékk svo beint rautt spjald í uppbótartíma áður en Jesse Lingard innsiglaði sigur United, 2:0, með því að ræna boltanum af Kasper Schmeichel markverði og skora í autt markið.
Með sigrinum endar United í 3. sæti deildarinnar með 66 stig og fyrir ofan Chelsea á markatölu sem sömuleiðis spilar í Meistaradeildinni á næstu leiktíð. Chelsea vann 2:0-heimasigur á Wolves þar sem frábært aukaspyrnumark Masons Mounts kom þeim yfir rétt fyrir hálfleik og Olivier Giroud tvöfaldaði forystuna 144 sekúndum síðar.
Tottenham tryggði sér 6. sætið og þar með þátttöku í Evrópudeildinni á næstu leiktíð eftir 1:1-jafntefli á útivelli gegn Crystal Palace. Harry Kane kom gestunum yfir á 13. mínútu en jeffrey Schlupp tryggði heimamönnum stig. Stigið dugði þó José Mourinho og liði hans þar sem Wolves tapaði gegn Chelsea og endar því í 7. sæti. Hvort það dugar úlfunum til að komast í Evrópudeildina fer eftir því hvort Arsenal vinnur enska bikarinn eða ekki, en liðið mætir Chelsea í úrslitaleiknum 1. ágúst.
Bournemouth er fallið þrátt fyrir 3:1-sigur gegn Everton á Goodison Park. Gylfi Þór Sigurðsson spilaði allan leikinn fyrir heimamenn en Joshua King kom gestunum yfir úr vítaspyrnu á 13. mínútu. Moise Kean jafnaði metin á 41. mínútu en Bournemouth bætti við tveimur mörkum. Dominic Solanke kom liðinu yfir rétt fyrir hálfleik og Junior Stanislas skoraði þriðja markið á 80. mínútu.
Það dugði þó ekki til þar sem Aston Villa náði 1:1-jafntefli á útivelli gegn West Ham og bjargaði sér því frá falli, á kostnað Bournemouth og Watford. Villa komst yfir seint í leiknum með marki frá fyrirliðanum Jack Grealish en heimamenn jöfnuðu metin mínútu síðar, Andriy Yarmolenko skoraði á 85. mínútu. Lokatölur 1:1 en það dugði til þar sem Watford tapaði gegn Arsenal 3:2. Tvö mörk frá Pierre-Emerick Aubameyang og eitt frá Kieran Tierney komu heimamönnum í þriggja marka forystu á Emirates-leikvanginum áður en Troy Deeney og Danny Welbeck minnkuðu muninn fyrir gestina en nær komust þeir ekki.
Englandsmeistarar Liverpool fengu bikarinn afhentan í síðasta leik og héldu eflaust einhverjir að þeir væru farnir í sumarfrí þegar Newcastle tók forystuna eftir 26 sekúndur á St. James Park í dag. Meistararnir áttu þó eftir að snúa taflinu við og unnu að lokum 3:1-sigur. Dwight Gayle kom heimamönnum yfir strax í upphafi en Virgil van Dijk jafnaði fyrir hálfleik og Divock Origi og Sadio Mané tryggðu meisturunum sigurinn.
Þá vann Manchester City öruggan 5:0-heimasigur á Norwich. City var öruggt með annað sætið og Norwich löngu fallið á botninum. Gabriel Jesus kom heimamönnum yfir snemma leiks áður en Raheem Sterling, Riyad Mahrez og Kevin de Bruyne (2) bættu við mörkum.
Úrslitin
Arsenal - Watford 3:2
Burnley - Brighton 1:2
Chelsea - Wolves 2:0
Crystal Palace - Tottenham 1:1
Everton - Bournemouth 1:3
Leicester - Manchester United 0:2
Manchester City - Norwich 5:0
Newcastle - Liverpool 1:3
Southampton - Sheffield United 3:1
West Ham - Aston Villa 1:1