Bandaríski knattspyrnumaðurinn Tyler Adams verður ekki meira með Leeds á tímabilinu eftir að hafa gengist undir skurðaðgerð vegna meiðsla aftan á læri.
Adams meiddist á æfingu hjá Leeds fyrr í mánuðinum en var þrátt fyrir það valinn í bandaríska landsliðshópinn fyrir leiki í Þjóðadeild Norður- og Mið-Ameríku í yfirstandandi landsleikjaglugga.
Vegna meiðslanna þurfti miðjumaðurinn vinnusami að draga sig úr hópnum og verður frá um skeið.
Leeds er í harðri fallbaráttu í ensku úrvalsdeildinni þar sem liðið er í 14. sæti, aðeins tveimur stigum fyrir ofan fallsvæðið.
Ítalinn Willy Gnonto og Austurríkismaðurinn Max Wöber meiddust þá í leikjum með landsliðum sínum um helgina og gætu misst af næsta leik Leeds, útileik gegn toppliði Arsenal.