Lewis Hamilton hjá McLaren var í þessu að vinna gríðarlega mikilvæga keppni um ráspól kínverska kappakstursins, en úrslit keppninnar um heimsmesitaratitil ökuþór gætu ráðist í keppninni á morgun. Helsti keppinautur hans, Felipe Massa hjá Ferrari, varð þriðji, rétt á undan Fernando Alonso hjá Renault.

Póllinn er sá sjöundi sem Hamilton vinnur á árinu og ef til vill sá mikilvægasti í keppninni við Massa. McLarenþórinn er sem stendur 5 stigum á undan ökumanni Ferrari  í titilkeppninni. Fyrir lokahringinn var hann í aðeins fimmta sæti, eftir að hafa tekist illa upp á næstsíðasta lokahring.

Allt gekk hins vegar upp í lokatilrauninni hjá Hamilton.

Kimi Räikkönen hjá Ferrari varð annar eftir að hafa lengstum verið með besta tímann í lokalotunni. Verði röð fremstu manna sú sama eftir fyrsta hring kappakstursins og í tímatökunum mun herfræði liðanna ráða miklu. Ferrari nýtur þess að vera með báða ökuþóra í fremstu röð því Heikki Kovalainen hjá McLaren varð aðeins fimmti.

Þá kemur ekki í ljós fyrr en á fyrstu hringjum hvernig bílarnir eru hlaðnir af bensíni. Hamilton var mun fljótari á lokasprettinum og er tæpast með þyngri bíl en ökumenn Ferrari. Massa var ekki eins beittur, bætti sig ekki nándar eins mikið og Hamilton í lokin og var aðeins 38 þúsundustu úr sekúndu fljótari en Alonso.

Á sama tíma og Hamilton styrkti strategíska stöðu sína eru vonir  Roberts  Kubica hjá BMW um titil líklega endanlega úr sögunni. Átti hann sína verstu tímatöku á vertíðinni, varð aðeins tólfti.

Mark Webber  hjá Red Bull varð sjötti en færist aftur um 10 sæti vegna mótorskipta fyrir tímatökurnar. Báðir ökumenn Toro Rosso komust í lokaumferðina og eina ferðina enn kemur smálið Red Bull-fyrirtækisins betur út en móðurliðið, því David Coulthard féll út í fyrstu umferð og hefur keppni fimmtándi en Webbver sextándi.

Rubens Barrichello hjá Honda komst í aðra lotu í fyrsta sinn frá í Montreal. 

Niðurstaða tímatökunnar varð annars sem hér segir:

Röð	Ökuþór	Bíll	Lota 1	Lota 2	Lota 3
1.	Hamilton	McLaren	1:35.566	1:34.947	1:36.303
2.	Räikkönen	Ferrari	1:35.983	1:35.355	1:36.645
3.	Massa	Ferrari	1:35.971	1:35.135	1:36.889
4.	Alonso	Renault	1:35.769	1:35.461	1:36.927
5.	Kovalainen	McLaren	1:35.623	1:35.216	1:36.930
6.	Webber	Red Bull	1:36.238	1:35.686	1:37.083
7.	Heidfeld	BMW	1:36.224	1:35.403	1:37.201
8.	Vettel	Toro Rosso	1:35.752	1:35.386	1:37.685
9.	Trulli	Toyota	1:36.104	1:35.715	1:37.934
10.	Bourdais	Toro Rosso	1:36.239	1:35.478	1:38.885
11.	Piquet	Renault	1:36.029	1:35.722
12.	Kubica	BMW	1:36.503	1:35.814
13.	Glock	Toyota	1:36.210	1:35.937
14.	Barrichello	Honda	1:36.640	1:36.079
15.	Rosberg	Williams	1:36.434	1:36.210
16.	Coulthard	Red Bull	1:36.731
17.	Nakajima	Williams	1:36.863
18.	Button	Honda	1:37.053
19.	Sutil	Force India	1:37.730
20.	Fisichella	Force India	1:37.739