Aganefnd spænska knattspyrnusambandsins hefur vísað frá áfrýjun Barcelona og þar með er ljóst að Brasilíumaðurinn Neymar missir af El Clasico á sunnudaginn þegar Barcelona sækir erkifjendurna í Real Madrid heim.
Neymar var úrskurðaður í þriggja leikja bann en hann fékk tvö gul spjöld í leik gegn Malaga um síðustu helgi og fór sjálfkrafa í eins leiks bann. Bannið var hins vegar lengt þar sem hann klappaði kaldhæðnislega í áttina að fjórða dómara leiksins á leið sinni af vellinum.
Neymar hefur þegar tekið út einn leik í banninu en hann missir af leiknum gegn Real Madrid og einnig gegn Osasuna í lok mánaðarins.