Franski fótboltamaðurinn Antoine Griezmann staðfesti í kvöld að hann verður áfram í herbúðum Atlético Madrid og að hann hafi hafnað Barcelona. Þetta gerði hann í heimildamynd sem ber nafnið La Decision, eða ákvörðunin, sem sýnd var í kvöld og var framleidd sérstaklega fyrir ákvörðun sóknarmannsins.
Griezmann vildi staðfesta ákvörðun sína áður en Frakkar léku sinn fyrsta leik á HM í Rússlandi en Frakkland mætir Ástralíu á laugardaginn kemur. Hann kom til Atlético frá Real Sociedad árið 2014 og hefur hann skorað 112 mörk fyrir félagið.
Með myndinni fetaði hann í fótspor LeBron James sem tilkynnti félagsskipti sín frá Cleveland til Miami í NBA körfuboltanum með heimildarmynd sem bar sama heiti.