Gianni Infantino, forseti Alþjóðaknattspyrnusambandsins, er ekki hrifinn af nýjasta útspili forráðamanna spænsku 1. deildarinnar, La Liga, um að spila leiki í Bandaríkjunum á næstu árum. Forráðamenn La Liga gáfu það út í sumar að á næstu fimm árum munu fimm leikir í spænsku 1. deildinni, fara fram í Bandaríkjunum.
Girona mun því taka á móti Barcelona, 26. janúar næstkomandi í Miami, ef áætlanir ganga eftir en bæði leikmannasamtök á Spáni og spænska knattspyrnusambandið hafa mótmælt þessu harðlega og nú hefur Infantino einnig blandað sér í umræðuna.
„Ef ég fengi að ráða myndi ég frekar vilja sjá frábæran MLS-leik í Bandaríkjunum en leik í spænsku 1. deildinni. Í fótbolta virkar það oftast þannig að þú spilar þína heimaleiki á eigin heimavelli, ekki í öðru landi,“ sagði forsetinn brattur.
Infantino bætti því við að FIFA gæti mögulega skorist í leikinn með þessar áætlanir forráðamanna La Liga en til þess þyrftu liðin í deildinni að senda inn formlega kvörtun til Alþjóðaknattspyrnusambandsins.