Cristiano Ronaldo lenti í átökum við aðdáanda eftir leik Juventus gegn Bayer Leverkusen í Meistaradeildinni í fótbolta í Þýskalandi í gærkvöld.
Þegar leikurinn hafði verið flautaður af hljóp áhorfandi í búningi Juventus inn á völlinn og faðmaði Ronaldo. Þegar annar slíkur kom í kjölfarið, tók utan um hálsinn á Ronaldo og reyndi að taka sjálfu á símann sinn brást hann illa við, hristi aðdáandann af sér og hélt síðan um hálsinn. Öryggisverðir voru þá mættir til að fjarlægja manninn.
Ronaldo skoraði fyrra mark Juventus í 2:0 sigri en lið hans hafði fyrir leikinn þegar tryggt sér sæti í 16-liða úrslitum Meistaradeildarinnar.