Gareth Bale þarf að hætta að sóa tíma sínum hjá Real Madríd og flytja sig um set sem fyrst. Þetta segir fyrrverandi forseti félagsins.
Walesverjinn hefur átt erfitt uppdráttar undanfarið í spænsku höfuðborginni, aðeins spilað 20 leiki á tímabilinu og skorað í þeim þrjú mörk. Real varð spænskur meistari á dögunum en féll svo úr keppni í Meistaradeild Evrópu gegn Manchester City þar sem Bale kom ekki við sögu.
„Það er dapurt að sjá leikmann eins og hann uppi í stúku. Hann er enn þá góður leikmaður og það þarf að finna lausn á þessu máli,“ sagði Ramon Calderon, fyrrverandi forseti Real Madríd, við spænska miðilinn AS. „Hann er að sóa tíma sínum, hann gæti verið að spila fyrir eitthvert annað stórlið.“
Jonathan Barnett, umboðsmaður Bales, segir að Walesverjinn vilji ekki fara frá félaginu enda eigi hann tvö ár eftir af samningi sínum. Sögusagnir hafa verið á kreiki um að framherjinn vilji snúa aftur til ensku úrvalsdeildarinnar, þar sem hann átti frábær ár með Tottenham.