Birkir lagði upp á Ítalíu

Íslenski landsliðsmaðurinn Birkir Bjarnason lagði upp mark sinna manna í Brescia gegn hans gömlu félögum í Pescara í ítölsku B-deildinni í knattspyrnu í dag.

Birkir var í byrjunarliði Brescia og spilaði allan leikinn en hann lagði upp mark á samherja sinn Filip Jagiello á 17. mínútu. Gestirnir jöfnuðu hins vegar metin og nældu í stig þökk sé marki Daniele Dessena um tuttugu mínútum fyrir leikslok. Hólmbert Aron Friðjónsson var ónotaður varamaður hjá Brescia.

Brescia er í 9. sæti deildarinnar með 44 stig eftir 33 leiki, stigi á eftir Chievo og í umspilssæti um að komast upp úr deildinni.

• Blogga um frétt