Knattspyrnumaðurinn Kristófer Ingi Kristinsson fékk hrós frá þjálfara sínum eftir að hafa spilað sinn fyrsta leik með SönderjyskE í dönsku úrvalsdeildinni í gær.
Kristófer kom til félagsins frá Grenoble í Frakklandi um helgina en hann var í láni hjá PSV Eindhoven síðasta vetur og spilaði með varaliði félagsins í hollensku B-deildinni.
Hann kom inn á sem varamaður gegn Vejle eftir 77 mínútna leik í gær og sú ákvörðun Michaels Boris, þjálfara liðsins, virtist ekki slæm því þremur mínútum síðar skoraði Victor Mpindis sigurmark SönderjyskE, 1:0.
„Hann getur spilað frammi og líka á vinstri kantinum. Hjá PSV lék hann báðar stöðurnar. Hann er líka stór og með góða skallatækni. Hann hefur allt sem við þurfum,“ sagði Boris þjálfari við staðarblaðið Jydske Vestkysten.