Guðlaug í 35. sæti á lokamótinu

Guðlaug Edda Hannesdóttir við keppni í dag.
Guðlaug Edda Hannesdóttir við keppni í dag. Ljósmynd/@wags.photo

Guðlaug Edda Hannesdóttir keppti í dag á lokamóti Alþjóðaþríþrautarsambandsins og hafnaði í 35. sæti. Keppt var í ólympískri þríþraut í Abú Dabí.

Lokamótið er sjöunda og síðasta mótið í heimsmeistaramótaröðinni og einungis stigahæstu þríþrautarkonur heims komast inn á mótið.

Guðlaug Edda var með rásnúmer 47 af 68 þríþrautarkonum sem stungu sér til sunds sér, en raðað er eftir styrkleika.

Syntir voru tveir 750 metra hringir og gekk fyrri hringurinn mjög vel hjá Guðlaugu Eddu en á seinni hring lenti í hún í mjög harðri baráttu við aðra þríþrautarkonu en sú fékk að lokum 15 sekúndna tímavíti fyrir þá framkomu.

Guðlaug Edda dróst því aðeins aftur úr í sundinu en náði að hjóla í hóp með 13 öðrum sem voru í sæti 45-57 meirihlutann af hjólaleggnum.

Guðlaug Edda hélt sinni stöðu mjög vel á hjólinu, nærði sig vel og kældi eins mikið og hægt var en mjög heitt var í keppninni sem fór fram um miðjan dag.

Hlaupið gekk svo mjög vel og hafnaði Guðlaug Edda að lokum í 35. sæti á móti allra sterkustu þríþrautarkonum heims.

Sigurvegari og heimsmeistari varð ólympíumeistarinn Flora Duffy.

Guðlaug Edda náði að keppa í fjórum stigamótum af 7 og endaði númer 64 í heildarstigakeppninni sem er jafnframt langbesti árangur hennar í þessari sterkustu mótaröð heims í þríþraut.

mbl.is
Fleira áhugavert
Fleira áhugavert