Bandaríkjamaðurinn ungi, Collin Morikawa, skaut mörgum af stærstu stjörnum golfíþróttarinnar ref fyrir rass á lokadegi PGA-meistaramótsins í gærkvöldi þegar hann lék lokahringinn á 64 höggum og vann mótið.
Morikawa er 23 ára, sex mánaða og þriggja daga gamall sem gerir hann að þriðja yngsta sigurvegara meistaramótsins frá síðari heimsstyrjöldinni. Aðeins Rory McIlroy og Jack Nicklaus voru yngri og þá var Tiger Woods einnig 23 ára þegar hann vann mótið í fyrsta sinn.
Morikawa hefur sýnt hvað í honum býr á árinu og sigraði á Workday Charity Open 12. júlí. Í síðustu viku hafnaði hann í 20. sæti á World Golf Championships. Í júní hafnaði hann í 2. sæti á Charles Schwab Challenge og varð í 9. sæti í mars á Arnold Palmer Invitational. Hann var í 12. sæti heimslistans fyrir mótið.