Guðrún Brá Björgvinsdóttir, Íslandsmeistari úr Keili, og Ólafía Þórunn Kristinsdóttir, úr GR, eru báðar úr keppni á Ladies Open mótinu í Sviss sem er hluti af Evrópumótaröðinni í golfi.
Mótið fer fram á Golfpark Holzhausern-vellinum í Sviss og hófst í gær en þær Guðrún og Ólafía komust hvorugar í gegnum niðurskurðinn eftir annan hringinn í dag. Ólafía var þó grátlega nálægt því.
Hún lék á 73 höggum í dag, eða einu yfir pari vallarins og einu höggi betur en á fyrsta hring í gær. Samtals var hún því á þremur höggum yfir pari, einu höggi frá því að komast í gegnum niðurskurðinn.
Guðrún Brá spilaði hringinn í dag á 75 höggum og var að lokum alls fjórum höggum yfir pari. Evrópumótaröðin, LET, er sú sterkasta í Evrópu. Þar á Valdís Þóra Jónsdóttir úr Leyni einnig keppnisrétt en hún tjáði Morgunblaðinu nýlega að hún myndi taka sér frí frá keppni út árið vegna bakmeiðsla.