Norður-Írinn Rory McIlroy er kominn á sigurbraut á ný á golfvellinum en hann sigraði á Wells Fargo Championship á PGA-mótaröðinni í gærkvöldi.
McIlroy beið í 553 daga eftir sigri sem telst mikið á hans mælikvarða og hafði fallið niður í 15. sæti á heimslistanum. Svo aftarlega hafði hann ekki verið síðan 2009.
McIlroy kann afar vel við sig á Quail Hollow vellinum því hann sigraði á mótinu í þriðja sinn. Áður vann hann mótið 2010, 2015 og 2021. McIlroy lék samtals á 10 höggum undir pari en Abraham Ancer var höggi á eftir.
McIlroy hafði öðrum hnöppum að hneppa síðasta haust þegar hann og eiginkonan eignuðust sitt fyrsta barn. Þá lék hann ekki sérlega vel og hafði heldur ekki fundið taktinn á þessu ári. En það hlaut að koma að því að svo sigursæll kylfingur myndi finna sveifluna og kemur ekki sérstaklega á óvart að það skuli gerast á Quail Hallow sem er í Norður-Karólínu.
McIlroy hefur nú unnið nítján sinnum á PGA-mótaröðinni. Ef kylfingar ná að vinna tuttugu sinnum þá fá þeir keppnisrétt á mótaröðinni eins lengi og þeir kjósa.