Bryson DeChambeau og Brooks Koepka munu mætast á golfvellinum í lok nóvember.
Um er að ræða sýningarviðburð þar sem þeir DeChambeau og Koepka mætast í Las Vegast og leika þar 12 holur. Verður viðureignin kölluð The Match líkt og þegar Tiger Woods og Phil Mickelson mættust fyrir nokkrum árum.
Viðburðurinn mun væntanlega fá talsverða athygli vegna þess að kapparnir hafa hnýtt hvor í annan á samfélagsmiðlum og í viðtölum af og til síðustu tvö árin.
Frá því að ljóst varð að þeir eiga litla samleið hafa þeir aldrei lent saman í ráshópi á mótum á mótaröðinni.
DeChambeau og Brooks Koepka voru liðsfélagar í Ryder-liði Bandaríkjanna á dögunum og féllust í faðma fyrir framan myndavélarnar þegar sigurinn var í höfn.