Handknattleikssamband Evrópu, EHF, hefur tilkynnt að Evrópumeistaramót karla, skipað leikmönnum 19 ára og yngri, verði haldið í ágúst á þessu ári. Mótið átti að fara fram í fyrra en var aflýst vegna kórónuveirufaraldursins.
Mótið verður haldið í Króatíu 12. til 22. ágúst en leikið verður í tveimur borgum, Varazdin og Koprivnica. Ísland verður í riðli með Serbíu, Slóveníu og Ítalíu en liðið var í efsta styrkleikaflokki vegna frábærs árangurs U18 ára liðsins á EM 2018 þar sem silfur var hreppt.
U19 ára landslið karla er skipað drengjum fæddum 2002 og síðar, þjálfarar liðsins eru þeir Heimir Ríkarðsson og Gunnar Andrésson.