Framkvæmdastjóri Handknattleikssambands Íslands, HSÍ, hefur vísað ummælum Björgvins Páls Gústavssonar, landsliðsmarkvarðar og leikmanns Vals, sem hann lét falla í samtali við mbl.is eftir leik gegn Fram í gærkvöldi til aganefndar sambandsins.
Ummælin sneru að óánægju Björgvins Páls með skotvalið hjá leikmönnum Fram í leik gærkvöldsins, þegar Valur vann fyrsta leik liðanna 34:24 í átta liða úrslitum úrslitakeppni karla í gærkvöldi.
„Ég átti von á að þeir myndu berja okkur í andlitið og ég átti von á því að þeir fengju rautt spjald. Ég átti von á því að fá boltann yfir hausinn og í hausinn. Þetta er það sama og gerðist í síðasta leik og það eru skýr skilaboð. Þeir ætla að fara þannig út.
Annaðhvort gera þeir þetta viljandi eða eru svona lélegir. Ég veit þeir eru góðir handboltamenn, svo það hlýtur að vera það fyrra. Ég er búinn að fá fjögur skot í hausinn frá þeim í tveimur leikjum.
Þeir vita að ég fékk skot í hausinn um daginn og það er um að gera að keyra á það þá. Þetta er mjög skynsamlegt hjá þeim. Það eru skýr skilaboð að skjóta yfir hausinn á mér eða í hausinn á mér. Þeir verða að svara fyrir það,“ sagði Björgvin Páll í samtali við mbl.is í gær.
Í úrskurði aganefndar HSÍ sem var birtur í dag segir:
„Aganefnd hefur borist erindi frá framkvæmdastjóra HSÍ fyrir hönd stjórnar vegna ummæla leikmanns Vals eftir leik Vals og Fram í úrslitakeppni Olís deildar karla. Með vísan til 20. gr. reglugerðarinnar mun aganefnd leita umsagnar málsaðila áður en úrskurðað verður í málinu. Handknattleiksdeild Vals er því gefinn frestur til kl.11.00, laugardaginn 23. apríl til að skila inn greinargerð vegna málsins.“
Næsti leikur Fram og Vals fer fram á sunnudag og ákveði aganefnd að aðhafast eitthvað frekar í málinu gæti Björgvin Páll verið úrskurðaður í bann og þar með misst af honum.
Með sigri í leiknum tryggir Valur sér sæti í undanúrslitum úrslitakeppninnar.