Olympiacos, sem mætir Val í síðari úrslitaleik Evrópubikarsins á laugardaginn, lék í dag í úrslitakeppni grísku deildarinnar í handbolta. Gríska liðið þarf að vinna upp fjögurra marka forskot Vals en fyrri leiknum lauk 30:26 fyrir Valsmenn.
Olympiacos er deildarmeistari eftir harða keppni við AEK Aþenu og mættu Drama 86 í hádeginu í úrslitakeppninni. Leiknum lauk með 41:29 sigri Olympiacos.
Grikkirnir taka á móti Valsmönnum í Friðar- og vináttuhöllinni í Pireus á laugardaginn klukkan 17:00.