Sameinað kvennalið Norður- og Suður-Kóreu í íshokkíi lék sinn fyrsta leik í dag, er það tapaði gegn Svíþjóð, 3:1, í vináttuleik. Leikurinn var liður í undirbúningi liðanna fyrir Ólympíuleikana í Pyeongchang, Suður-Kóreu.
Það kom mörgum á óvart er tilkynnt var um sameinað lið Suður- og Norður Kóreu enda samband ríkjanna ekki gott. Liðin mætast aftur á Ólympíuleikunum, en leikurinn í dag var eini leikurinn hjá sameinaða Kóreuliðinu fyrir leikana.
Leikurinn fór fram í Suður-Kóreu og samkvæmt BBC var stemningin góð. Einhverjir voru þó ekki sáttir við sameinaða liðið, því lítill hópur fólks hópaðist fyrir framan völlinn og mótmælti. Einhverjir í Suður-Kóreu eru svo ósáttir við sameininguna, þar sem hún minnkar möguleika liðsins á að hafna í verðlaunasæti.