Máté Dalmay mun áfram þjálfa körfuknattleikslið Hamars en hann hefur framlengt samning sinn við félagið um eitt ár. Næsta tímabil verður hans þriðja með liðið en Hamar leikur í fyrstu deildinni.
Máté var í tilfinningaríku viðtali við mbl.is fyrir nokkrum vikum eftir að tímabilið var flautað af vegna útbreiðslu kórónuveirunnar. Stjórn KKÍ ákvað að Höttur færi upp í efstu deild á kostnað Fjölnis sem fellur. Hamar var tveimur stigum frá Hetti í deildinni og hefði farið upp í toppsætið með sigri á Hetti þar sem liðin áttu eftir að mætast innbyrðis. Hamar gaf skömmu síðar út yfirlýsingu og fordæmdi ákvörðun KKÍ.