Dominykas Milka var stigahæstur Keflvíkinga þegar liðið heimsótti Þór frá Þorlákshöfn í toppslag úrvalsdeildar karla í körfuknattleik, Dominos-deildarinnar, í Icelandic Glacial-höllina í Þorlákshöfn í gær.
Milka skoraði 21 stig og tók sex fráköst en leiknum lauk með sex stiga sigri Keflavíkur, 94:88.
Mikið jafnræði var með liðunum allan leikinn og leiddu Þórsarar með einu stigi í hálfleik, 41:40.
Keflvíkingar unnu þriðja leikhluta með sex stiga mun og náðu að halda út í fjórða leikhluta.
Hörður Axel Vilhjálmsson átti einnig mjög góðan leik fyrir Keflavík, skoraði 19 stig og gaf tólf stoðsendingar, en hjá Þórsurum var Styrmir Snær Þrastarson stigahæstur með 15 stig.
*Tyler Sabin átti enn einn stórleikinn fyrir KR þegar liðið heimsótti Tindastól á Sauðárkrók.
Sabin gerði sér lítið fyrir og skorað 36 stig fyrir Vesturbæinga, ásamt því að gefa sjö stoðsendingar en leiknum lauk með 104:99-sigri KR.
KR-ingar voru sterkari í fyrri hálfleik en Tindastóll leiddi með tveimur stigum fyrir fjórða leikhluta, 75:73.
Sabin kom KR yfir 79:77 með þriggja stiga körfu þegar níu mínútur voru til leiksloka og Stólarnir náðu ekki að snúa leiknum sér í vil eftir það.
Umfjöllunina um Íslandsmótið í körfuknattleik má lesa í Morgunblaðinu í dag.