Eric Fongue, sem á að baki leiki með svissneska landsliðinu, mun leika með Þór frá Akureyri í úrvalsdeild karla í körfuknattleik á næsta keppnistímabili.
Þórsarar eru greinilega á fullu að setja saman leikmannahópinn fyrir næsta tímabil því í gær var tilkynnt að félagið hefði samið við bandaríska bakvörðinn Jonathan Lawton.
Á heimasíðu Þórs segir meðal annars um Fongue:
„Eric er 30 ára gamall og kemur frá Zürich í Sviss. Hann er 198 sentimetra hár og spilar stöðu framherja. Eric á nokkra leiki með svissneska landsliðinu og hefur meðal annars heimsótt Ísland vegna landsleiks Íslands og Sviss árið 2016.
Eric hefur spilað allan sinn atvinnumannsferil í heimalandinu en var fjögur ár í háskóla í Bandaríkjunum og þar af lokaárið sitt í University of Alaska Fairbanks.“
Þórsarar enduðu í sjöunda sæti úrvalsdeildarinnar á nýliðinni leiktíð og töpuðu fyrir Þór frá Þorlákshöfn í átta liða úrslitum úrslitakeppninnar.