Njarðvíkingar voru ekki í vandræðum með ÍR þegar liðin mættust í Skógarseli í Subway-deild kvenna í körfubolta í kvöld. Leiknum lauk með 16 stiga sigri Njarðvíkur, 77:61.
Leikurinn var nokkuð jafn í fyrri hálfleik en Njarðvík leiddi með átta stigum þegar liðin gengu til búningsherbergja í hálfleik. Skelfilegur þriðji leikhluti ÍR-inga varð þeim svo að falli en Njarðvík vann þann leikhluta 26:8. Eftir það var það hálfgert formsatriði fyrir gestina að vinna sigur.
Raquel De Lima Viegas Laneiro var stigahæst í liði Njarðvíkur með 19 stig en Aliyah Collier kom næst með 16 stig. Hjá ÍR var Greeta Uprus lang stigahæst með 25 stig.
Eftir sigurinn er Njarðvík með 20 stig í fjórða sæti deildarinnar. ÍR er enn á botninum með einungis tvö stig eftir 18 umferðir.