IKEA hefur gert samkomulag við þrjár bandarískar fjölskyldur um greiðslu miskabóta upp á 50 milljónir Bandaríkjadala, sem svarar til 5,7 milljarða króna, vegna andláts barna þeirra þegar kommóður keyptar í IKEA sporðreistust og börnin urðu undir.
Um er að ræða gríðarlega vinsælar kommóður, Malm, en börnin þrjú voru um tveggja ára aldur þegar þau létust, það síðasta í febrúar.
Samkvæmt frétt NBC verður fénu skipt jafnt á milli fjölskyldnanna. Eins mun IKEA ánafna 50 þúsund Bandaríkjadölum til þriggja barnaspítala og 100 þúsund dölum til samtaka sem ekki eru rekin í ágóðaskyni en annast öryggiseftirlit.
Eftir síðasta dauðsfallið innkallaði IKEA tæplega 30 milljónir Malm-kommóða í nokkrum löndum. Áður hafði viðskiptavinum verið boðið upp á ókeypis veggfestingar til þess að tryggja að kommóðan sporðreistist ekki. Eigendur slíkra kommóða voru hvattir til þess að taka þær strax úr notkun ef þær væru ekki veggfastar á þeirra heimili. Jafnframt var mælt með því að fólk væri ekki með Malm-kommóður í barnaherbergjum.
IKEA hefur selt meira en 147 milljónir kommóða síðustu 13 árin og er rúmlega helmingur þeirra, 78 milljónir, af Malm-gerð.
Curren Collas var tveggja ára gamall þegar hann varð undir Malm-kommóðu á heimili sínu fyrir tveimur árum. Þegar móðir hans, Jackie Collas, fór inn í herbergið hans til þess að klæða hann sá hún kommóðuna liggjandi á hliðinni.
„Ég sá hann hvergi svo ég sneri öllu við í herberginu. Síðan sá ég að höfuðið á honum var fast á milli rúmsins og kommóðunnar,“ segir hún í viðtali við NBC. Kommóðan hafði ekki verið fest við vegginn.
Janet McGee, móðir Ted sem lést í febrúar eftir að hafa fengið kommóðuna yfir sig, segir að hún vilji engum svo illt að þurfa að ganga í gegnum það sem fjölskyldan upplifði. Ted var 22 mánaða þegar hann lést. Hún segir að engir peningar geti komið í staðinn fyrir barnið sem þau misstu.
Camden Ellis fékk kommóðuna yfir sig á heimili sínu í Washington árið 2014. Þrátt fyrir víðtækar aðgerðir til þess að reyna að bjarga lífi hans var slökkt á öndunarvél hans 15. júní 2014, aðeins nokkrum dögum eftir tveggja ára afmæli hans.