Kynning á rökum fyrir ákvörðun peningastefnunefndar fer nú fram í húsakynnum Seðlabanka Íslands og er hægt að horfa á hana í beinni hér að neðan.
Peningastefnunefndin ákvað að lækka stýrivexti um 0,25 prósentur. Meginvextir bankans, vextir á sjö daga bundnum innlánum, verða því 4,75%.
Í fréttatilkynningu bankans segir að horfur séu á hröðum hagvexti í ár eins og í fyrra og bæði árin umfram það sem spáð var í febrúar. Frávikið skýrist einkum af meiri vexti ferðaþjónustu en áður var búist við en að auki er útlit fyrir meiri slökun í aðhaldi opinberra fjármála í ár.
Á kynningunni munu þeir Már Guðmundsson, seðlabankastjóri og formaður peningastefnunefndar, og Þórarinn G. Pétursson, framkvæmdastjóri hagfræði og peningastefnu í Seðlabankanum, sem einnig situr í peningastefnunefnd, gera grein fyrir rökum peningastefnunefndar fyrir ákvörðun sinni.