Gray Line hyggst halda sínu striki

„Við höfum í sjálfu sér engar áhyggjur af þessu, við sjáum bara tækifæri í þessu,“ segir Þórir Garðarsson, stjórnarformaður Gray Line, í samtali við mbl.is. Gray Line tapaði í útboði Isavia á aðstöðu fyr­ir hóp­ferðabif­reiðar við Flug­stöð Leifs Ei­ríks­son­ar en fyrirtækið hyggst þó halda áfram að bjóða upp á áætlunarferðir til og frá flugstöðinni.

Kynnisferðir buðu hæst eða 41,2% af veltu og þá áttu Hópbílar næsthæsta tilboðið upp á 33,33% af veltu. Gray line bauð 26,56% sem Þórir segir vera algjört hámark.

Frétt af mbl.is

Kynnisferðir og Hópbílar buðu betur

Í bókun sem Gray Line lagði fram á opnunarfundi útboðsins er áréttað að útboðið feli ekki í sér einkaleyfi á reglubundnum ferðum til og frá flugstöðinni með ferðamenn sem um hana fara. Útboðið taki til aðstöðu sem feli í sér „að rekstrarleyfishafar hafi greiðari aðgang að aðstöðunni, flugstöðinni og farþegum en aðrir aðilar sem bjóða upp á sambærilega þjónustu á svæðinu,“ líkt og fram hafi komið í fyrirspurnasvörum útboðsins. Um sé að ræða pláss fyrir miðasölubás inni í flugstöðinni og bílastæði næst flugstöðvarbyggingunni.

Hyggst Gray Line því halda áfram að þjónusta viðskiptavini í ferðum til og frá flugvellinum en viðskiptavinir fyrirtækisins eru að sögn Þóris í flestum tilfellum búnir að bóka og greiða fyrir ferðir sínar löngu áður en þeir stíga fæti inn í flugstöðina.

Halda áfram að bjóða sömu þjónustu

Gjaldið sem Gray Line bauð í útboðinu, 26,56% af miðasöluveltu frá flugstöðinni, var „algjört hámark og rúmlega það sem eðlilegt gæti talist að leggja á sem kostnaðarauka fyrir viðskiptavini félagsins, m.a. til að félagið hafi greiðari aðgang að sölu ferða innan flugstöðvarinnar,“ að því er segir í bókuninni. Sú sala sé óverulegt hlutfall af heildarviðskiptum í flugstöðvarakstrinum.

„Raungerist það að Gray Line missi aðstöðu þá sem félagið hefur á leigu í dag í og við flugstöðina, mun félagið engu að síður halda áfram að bjóða viðskiptavinum sínum sömu þjónustu og áður, í almennum stæðum flugstöðvarinnar. Fargjöld verða enn samkeppnishæfari en áður, enda kom skýrt kom fram í fyrirspurnasvörum útboðsins að ekki yrði reynt að koma í veg fyrir samkeppni, enda samrýmist það ekki lögum,“ segir enn fremur í bókuninni.

Tækifæri felist í tapinu

Að sögn Þóris er útreikningur á veltugjaldinu bundinn lágmarksupphæð veltu sem sé 500 milljónir króna með virðisaukaskatti og gerð krafa um að bjóðandi greiði a.m.k. 85% af áætlaðri veltu eða af því sem nemur 382.500.000. Gray Line hafi í þau sex ár sem fyrirtækið hafi haft aðstöðu í flugstöðinni ekki náð slíkri veltu. 

Segir Þórir tækifæri felast í því að hafa tapað útboðinu. Samkeppnishæfi fyrirtækisins geti aukist enda þurfi félagið ekki að greiða veltugjald til Isavia upp á hundruð milljóna króna. 

„Airport Express undir merki Gray Line er vörumerki og áætlun sem við hjá Gray Line erum búin að byggja upp í mörg ár og eigum í miklum og góðum viðskiptasamböndum við erlendar ferðaskrifstofur sem selja í ferðir. Akstursáætlun okkar eftir breytingu á bílastæðum og aðstöðu mun verða óbreytt en ef eitthvað er þá mögulega fjölga brottförum,“ segir Þórir.

„Við lítum á breyttar aðstæður sem tækifæri til að bæta okkar þjónustu og fjölga viðskiptavinum í Airport Express-ferðum okkar og lykilinn að því er lægri kostnaður en hjá okkar samkeppnisaðilum.“

• Blogga um frétt