Verslunarstörf eru smám saman að verða „karlastörf“, ef marka má þróunina milli áranna 2015 og 2016.
Þá fjölgaði körlum í verslunarstörfum um 1.500 á meðan konum fækkaði um 100. Alls fjölgaði því í starfsstéttinni um 1.400 manns frá árinu áður eða sem nam 6%.
Þetta kemur fram í nýjum tölum frá Rannsóknarsetri verslunarinnar sem gilda til ársins 2017.
Árið 2016 var heildarvelta í smásöluverslun 429,7 milljarðar króna og jókst um 7,9% frá árinu áður. Árlegur vöxtur í veltu smásöluverslunar hefur ekki verið meiri frá hruni.
Árið 2016 var heildarhlutur verslunar í landsframleiðslu 9,8%, sem er hærra hlutfall en hefðbundins iðnaðar og einnig hærra en sjávarútvegs að meðtaldri vinnslu afurða, samkvæmt tilkynningunni.
Mest velta í íslenskri smásöluverslun er í flokki stórmarkaða og dagvöruverslana og nam hún árið 2016, 211,4 milljörðum kr. eða sem nemur 49,2% af heildarveltu íslenskrar smásölu.
Í árslok 2016 voru 2.236 smásölufyrirtæki í landinu samkvæmt skráningu Hagstofu Íslands. Það eru 22 fyrirtækjum færri en ári áður.