Hagnaður Orkuveitu Reykjavíkur (OR) nam 3,8 milljörðum króna á öðrum ársfjórðungi. Á sama tímabili í fyrra nam hagnaður OR 1,3 milljörðum króna. Sé litið til fyrstu sex mánaða ársins nam hagnaður félagsins 4,2 milljörðum króna samanborið við 7,3 milljarða króna í fyrra.
Eignir samstæðunnar námu 315,5 milljörðum króna í lok júní, eigið fé nam 149 milljörðum og er eiginfjárhlutfallið 47,3%.
EBITDA, hagnaður fyrir fjármagnsliði, afskriftir og skatta, nam 14,5 milljörðum króna á fyrri árshelmingi samanborið við 13,5 milljarða á fyrri árshelmingi ársins 2017.
Í tilkynningu frá félaginu segir að aukin umsvif í samfélaginu, fjöldi nýbygginga og kalt tíðarfar hafi enn fremur valdið því að tekjur OR og dótturfélaga jukust um 1,5 milljarða króna miðað við sama tímabil í fyrra.
„Þetta gerðist þrátt fyrir lækkun á gjaldskrám Veitna fyrir kalt vatn og rafmagnsdreifingu í upphafi árs. Rekstrargjöld jukust á sama tíma um 560 milljónir króna og valda [sic] þar mestu aukinn launakostnaður við fjölgun starfsfólks vegna verkefna sem leiða af auknum umsvifum í samfélaginu,“ segir í tilkynningu frá OR.
Bjarni Bjarnason, forstjóri OR, segir rekstur fyrirtækisins standa traustum fótum.
„Rekstur og fjárhagur OR stendur traustum fótum. Því horfum við nú langt fram á veginn og hugum að uppbyggingu veitukerfa og þeirri þjónustu sem fólk vill njóta í framtíðinni. Í vor ræddum við fráveitumálin á ársfundinum okkar, aukna sjálfvirkni í þjónustu og það mikilvæga umhverfisverkefni sem orkuskipti í samgöngum eru. Nú blasir við að kortleggja þessa vegferð skref fyrir skref.“