Skilmálar skuldabréfaútboðs WOW Air kveða á um að félagið gefi út skuldabréf fyrir allt að 100 milljónir evra, eða um 13 milljarða króna.
Flugfélagið stefnir á skráningu á hlutabréfamarkað í kauphöllinni í Frankfurt „eins fljótt og hægt er“, að því er kemur fram í frétt Vísis.
WOW air þarf að standast ströng álagspróf vegna eiginfjár og lausafjár, auk þess sem félagið þarf að bæta upplýsingagjöf til fjárfesta.
Skuldabréfin verða gefin út til þriggja ára og eru tryggð með veði í öllum hlutabréfum WOW air og dótturfélaga þess. Nafnvirði hvers bréfs nemur 100 þúsund evrum, eða um 13 milljónum króna.
WOW air ákvað að fara í útgáfu skuldabréfa til þess að endurfjármagna skuldir félagsins og brúa fjárþörf fram að frumútboði félagsins, sem stefnt er að innan eins og hálfs árs.