Á fáum mánuðum hafa einstaklingar lagt um 12 milljarða inn á innlánsreikninga hjá Auði, nýrri fjármálaþjónustu Kviku banka. Það er um 20% meira fjármagn en bjartsýnustu menn þorðu að gera ráð fyrir að safnast myndi á fyrsta ári starfseminnar.
Marinó Örn Tryggvason, sem tók við forstjórakeflinu fyrir þremur mánuðum hjá bankanum, segir að Auður sé fyrsta dæmið af mörgum um hvernig Kvika hyggist hasla sér völl á fleiri sviðum fjármálaþjónustu í landinu. Hann segir smæð bankans og sveigjanleika gefa honum ótvírætt tækifæri til að sækja fram með þeim hætti sem viðskiptabönkunum sé ekki mögulegt.
„Þeir byggja allir á grunni fyrri stofnana sem höfðu væntingar um að þjónusta milljónir manna í Evrópu og byggðu upp innviði til að geta risið undir því. Þegar hrunið varð brugðust þeir svo allir eins við. Þeir drógu úr kostnaði, fækkuðu fólki og útibúum og fjárfestu í tækni en ná ekki að halda uppi arðsemi, m.a. vegna eiginfjárkrafa. Þeir eru því í raun með það sem kalla má erft viðskiptamódel sem er ekki hannað fyrir markaðinn í dag og það veldur því að þeir ná ekki nægilegri arðsemi.“
Þá segir Marinó í ítarlegu viðtali á miðopnu ViðskiptaMoggans í dag að fyrir dyrum standi miklar breytingar á fjármálakerfinu þar sem bankar muni í minni mæli en áður miðla fjármagni í gegnum eigin efnahagsreikning. Því ráði m.a. sú staðreynd að stærstu fjármagnseigendur landsins séu nú stærri en bankarnir, ólíkt því sem var á árunum fyrir hrun.
Lesa má viðtalið í heild sinni í ViðskiptaMogganum í dag.