Pétur Hafsteinsson, framkvæmdastjóri fjármálasviðs Festar, hefur gert samkomulag við félagið um starfslok sín. Hefur hann starfað hjá N1 og Festi í 12 ár, fyrstu árin við greiningar og hagdeildarstörf og síðar deildarstjóri hagdeildar og rekstrareftirlits frá 2011 og sem framkvæmdastjóri fjármálasviðs frá árinu 2015.
Í tilkynningu til Kauphallarinnar er haft eftir Eggerti Kristóferssyni, forstjóra Festar, að hann þakki Pétri frábært samstarf og óski honum alls velfarnaðar í framtíðinni.
Eggert mun gegna starfinu tímabundið en starf framkvæmdastjóra fjármálsviðs Festar verður auglýst á næstu dögum.
Þetta er ekki eina breytingin sem hefur átt sér stað meðal stjórnenda Festar í dag, en fyrr í dag var greint frá því að Björgólfur Jóhannsson hefði sagt sig úr stjórninni eftir að hann tók við tímabundið sem forstjóri Samherja.