Hjörtur ráðinn framkvæmdastjóri hjá Íslandshótelum

Hjörtur Valgeirsson hefur verið ráðinn framkvæmdastjóri rekstrarsviðs Íslandshótela. Hann lauk BA-námi í hótelstjórnun í South Bank University Business School í Englandi árið 2003 og útskrifaðist með MBA-gráðu úr Vlerick Management School í Belgíu árið 2010.

Þetta kemur fram í tilkynningu frá Íslandshótelum.

Hjörtur hefur starfað við hótelstörf frá árinu 1998 og meðal annars stýrt Eddu hótelunum fyrir Icelandair Hotels. Á árunum 2011-2014 starfaði hann í Kína við veitingarekstur og gæðastjórnun. Hjörtur var í stjórnendateymi við innleiðingu á fyrsta Hilton hóteli Íslands á Hilton Reykjavík Nordica þar sem hann starfaði í 3 ár. Hjörtur hefur einnig starfað á The Halkin London og Crowne Plaza London.

Á árunum 2014 til 2016 starfaði Hjörtur sem hótelstjóri á Centerhotel Þingholti. Frá árinu 2016 hefur Hjörtur starfað sem hótelstjóri á Fosshótel Reykjavík, stærsta hóteli landsins og stýrt þar að auki veitingastöðunum Haust Restaurant og Bjórgarðinum.

Íslandshótel á og rekur 17 hótel með yfir 1.800 gistirými út um allt land auk funda- og ráðstefnuaðstöðu. Þetta eru Grand Hótel Reykjavík sem er stærsta ráðstefnu hótel landsins, Hótel Reykjavík Centrum og 15 Fosshótel hringinn í kringum landið. Auk þess er nýtt fjögurra stjörnu hótel í byggingu við Lækjargötu sem er fyrirhugað að opni árið 2021.

• Blogga um frétt