Sumarið fer í sögubækurnar

Árið 2021 hefur verið viðburðaríkt ár fyrir íslenska nýsköpunarfyrirtækið GeoSilica, sem nýtir affallsvatn frá Hellisheiðarvirkjun til framleiðslu kísilsteinefna. Hefur fyrirtækið meðal annars stofnað dótturfyrirtæki í Hollandi og ráðið starfsmann þar í landi.

Fida Abu Libdeh, framkvæmdastjóri og stofnandi GeoSilica, segir í samtali við ViðskiptaMoggann að tíminn í kórónuveirufaraldrinum hafi verið notaður til að skoða hvað hægt væri að bæta á núverandi vettvangi og efla rannsóknir, þar sem tækifæri til sóknar hafi verið takmörkunum háð og tafir væru á ýmsu því tengdu.

„Sumarið 2021 fer í sögubækurnar hjá GeoSilica en júní var okkar söluhæsti mánuður frá upphafi. Okkur tókst svo að toppa okkur í júlí og aftur í ágúst. Sumartíminn hefur verið rólegur síðastliðin ár en við sáum tækifæri í núverandi ástandi í þjóðfélaginu til þess að bæta ofan á grunninn sem byggður hefur verið.“

Innreið á Bandaríkjamarkað

GeoSilica hefur einnig hafið innreið sína á Bandaríkjamarkað, en vörur félagsins eru sendar um öll Bandaríkin út frá vöruhúsi í Portland í Maine. Þá sjá tveir dreifingaraðilar um að selja GeoSilica í verslanir um allt landið og viðræður eru að sögn Fidu hafnar við fleiri dreifendur. „Stærstu tíðindin frá Bandaríkjunum eru að GeoSilica var skrásett sem vörumerki þar í landi á dögunum sem við erum afar stolt af.“

Lestu meira um málið í ViðskiptaMogganum í dag.