„Segja að hann sé stærri en í fyrra“

„Það verður að segjast að þetta er góð veiði og byrjunin lofar góðu. Það var töluvert að sjá á veiðislóðinni en fiskurinn var ekki á stóru svæði,“ segir Gísli Runólfsson, skipstjóri á Bjarna Ólafssyni AK, sem kom með 1.800 tonn af kolmunna til Seyðisfjarðar í gærkvöldi.

„Það var prýðisveður á meðan við vorum á miðunum og það skiptir alltaf miklu máli. Fiskurinn sem fæst er líka góður og strákarnir segja að hann sé stærri en í fyrra.“

Gísli segir kolmunnaveiðina í færeysku lögsögunni fara mjög vel af stað.

„Hjá okkur gekk afar vel að fá í bátinn. Við fengum þessi 1.800 tonn í þremur holum og toguðum fyrst í 14 tíma, síðan í sjö og loks í tólf.“

Fram kemur á vef Síldarvinnslunnar að Börkur NK kom í morgun til Neskaupstaðar með rúmlega 2.100 tonn. Þá er Hákon EA væntanlegur til Seyðisfjarðar í kvöld með um 1.700 tonn. Beitir NK er sömuleiðis á veiðum og var í morgun kominn með 2.100 tonn.

• Blogga um frétt