Ofurkæling á laxi við slátrun á Djúpavogi

„Þetta gerir okkur kleift að pakka laxinum í kassa við einnar gráðu frost árið um kring. Með því tryggjum við mestu mögulegu gæði og fiskurinn fær 3-5 daga auka-geymsluþol,“ segir Guðmundur Gíslason, stjórnarformaður Fiskeldis Austfjarða.

Búlandstindur á Djúpavogi sem slátrar og pakkar laxinum fyrir fyrirtækið hefur tekið í notkun nýtt kerfi, svokallað ofurkælikerfi, við slátrun á laxi, að því er fram kemur í umfjöllun um mál þetta í Morgunblaðinu í dag.

Kerfið er hannað af fyrirtækinu Skaginn 3X. Það afkastar allt að 13 tonnum á sólarhring. Ekki þarf að setja nema lítið af ís í kassana til kælingar við útflutning. Það sparar flutningskostnað og umbúðirnar nýtast betur. Þá er það mikilvægt að ofurkælingin lengir geymsluþol fisksins. Guðmundur segir að það komi sér vel vegna þess að Ísland er lengra frá mörkuðum en helstu samkeppnislönd.