200 mílur efna til keppni í samstarfi við Morgunblaðið um bestu ljósmyndina, þar sem myndefnið tengist sjávarútvegi eða sjávarsíðunni. Í verðlaun eru veglegar gjafakörfur auk þess sem bestu myndirnar munu birtast í næstu útgáfu sjávarútvegsblaðs 200 mílna og Morgunblaðsins, sem kemur út í byrjun júní.
Tvívegis áður hafa 200 mílur efnt til ljósmyndakeppni og fengið góðar viðtökur, en afrakstur þeirra má sjá hér og hér.
Að þessu sinni verða farnar tvær leiðir til að skera úr um bestu myndina, en annars vegar verður skipuð sérstök dómnefnd innan ritstjórnar blaðsins og hins vegar verður það val lesenda sem ræður, en þeir munu geta kosið um bestu myndina á Facebook-vef 200 mílna. Þannig er líklegt að tveir sigurvegarar standi uppi þegar keppninni er lokið.
Eins og áður eru áhugasamir hvattir til að virkja sköpunarkraftinn og láta hugann fara á flug við myndasmíðina, enda myndefni og sjónarhorn svo gott sem óteljandi þegar sjórinn, sjósókn og sjávarsíðan öll er annars vegar. Nánari leiðbeiningar má sjá hér að neðan.
Ljósmyndin sem bar sigur úr býtum í fyrstu keppni 200 mílna. Ágúst GK-95 kemur inn til Grindavíkur í slæmu veðri.
Ljósmynd/Jón Sæmundsson.
Leiðbeiningar fyrir ljósmyndara
- Skilafrestur innsendinga er til miðnættis fimmtudaginn 24. maí.
- Myndir til þátttöku sendist á netfangið 200milur@mbl.is.
- Vert er að benda á það, að hver þátttakandi getur aðeins sent eina mynd í keppnina. Hafa ber þá í huga að myndina má taka jafnt á sjó sem og landi.
- Vænlegast til árangurs er að senda myndirnar í hæstu mögulegu upplausn, svo þær geti prentast með góðu móti á síðum blaðsins.
- Fullt nafn rétthafa myndarinnar skal fylgja innsendingunni og sömuleiðis má endilega fylgja lýsing á myndefninu, hvar myndin er tekin og hvaðeina annað sem frætt getur lesendur um það sem fyrir augu ber.
- Stefnt er að því að birta myndirnar á Facebook-vef 200 mílna föstudaginn 25. maí.
- Kosningunni lýkur þar á miðnætti sunnudaginn 27. maí, og hafa lesendur og aðrir áhugasamir því þrjá daga fram að því til að votta bestu myndinni „like“ sitt.