„Erfitt verk að koma öllu fyrir“

„Það var kominn tími á þessar endurbætur enda eru gömlu eimingartækin, sem við skiptum út, orðin 20 til 30 ára gömul. Með nýju tækjunum eiga afköstin að verða stöðugri og aukast frá því sem nú er. Það bætir rekstraröryggið. Of snemmt er að segja til um um áhrifin á orkunotkunina en við erum að vona að nýju tækin eyði minni raforku.”

Þetta segir Sveinbjörn Sigmundsson, verksmiðjustjóri HB Granda á Vopnafirði, en um þessar mundir er þar unnið að endurbótum á fiskimjölsverksmiðju útgerðarinnar. Verður þremur af eimingartækjum verksmiðjunnar skipt út fyrir ný og á verkinu að vera lokið fyrir 20. janúar.

Trésmíðafyrirtæki rýfur þakið

Nýju eimingartækin voru smíðuð hjá Héðni hf. og sjá starfsmenn þess fyrirtækis um uppsetninguna með hjálp starfsmanna verksmiðjunnar og verktaka á Vopnafirði, að því er fram kemur á heimasíðu útgerðarinnar.

„Við fengum trésmíðafyrirtæki á staðnum til að rjúfa þak verksmiðjunnar og svo voru gömlu tækin hífð út og þau nýju inn. Okkur telst til að þetta hafi alls verið 160 til 170 tonn,” segir Sveinbjörn.

„Það gefur að skilja að það er erfitt verk að koma öllu fyrir og við höfum þurft að vinna allt upp í 18 metra hæð frá gólfi. En verkinu miðar mjög vel og við bætum bara í ef aflafréttir nú eftir áramótin gefa tilefni til þess.“

• Blogga um frétt