Hægist verulega á kolmunnaveiðunum

Hægst hefur verulega á kolmunnaveiðunum í færeysku lögsögunni að undanförnu og síðasta sólarhringinn var veiðin léleg. Þetta kemur fram á vefsíðu Síldarvinnslunnar en fyrir vikið er ráðgert að skip félagsins geri hlé á veiðunum.

Þar segir að Bjarni Ólafsson AK hafi þegar hætt veiðum í bili, Margrét EA hafi landað á Seyðisfirði rúmlega 2.000 tonnum í gær og einnig gert hlé á veiðunum, Beitir NK sé á landleið með 3.000 tonn og muni væntanlega landa á Seyðisfirði og Börkur NK komi til Neskaupstaðar í dag með tæplega 2.300 tonn. Hákon EA hafi enn verið á miðunum þegar síðast hafi frést en verið við það að fylla að því er segir í umfjölluninni.

„Það hefur hægst verulega á veiðinni frá því hún var best. Í þessum túr var þetta þó köflótt hjá okkur. Þetta er í reyndinni allt hefðbundið. Þegar kemur fram í maí og kolmunninn gengur norður eftir dreifir hann sér og þá minnkar veiðin eðlilega. Í þessari veiðiferð byrjuðum við að veiða norður í Ræsi og austan í Færeyjabanka en enduðum sunnan við Munkagrunn. Við höfum oft verið að veiða kolmunna fram undir sjómannadag en vegna loðnubrestsins var veitt meira en venjulega niður á Rockall þannig að skipin hafa veitt meira af kvótanum en að öllu jöfnu. Það er mjög eðlilegt að gert sé hlé á veiðunum núna vegna þess að veiðin fer minnkandi og vegna kvótastöðunnar,“ er haft eftir Hjörvari Hjálmarssyni, skipstjóra á Berki.

• Blogga um frétt