Aflamarki fiskveiðiársins úthlutað

Aflamarki fiskveiðiársins 2019/2020 hefur verið úthlutað af Fiskistofu. Fram kemur á vef Fiskistofu að úthlutað hafi verið 372 þúsund tonnum í þorskígildum talið samanborið við um 384 þúsund þorskígildistonn í fyrra og er því samdrátturinn 12 þúsund þorskígildistonn milli ára.

Þá er úthlutun í þorski rúmlega 215 þúsund tonn og eykst um sjö þúsund tonn frá fyrra ári. Ýsukvótinn er rúm 32 þúsund tonn og dregst saman um 13 þúsund tonn. Aukning í  ufsakvótanum er eitt þúsund tonn en um eitt þúsund tonna samdráttur í grálúðu og úthafsrækju.

Frétt af mbl.is

Kanna ástand loðnustofnsins

Þá er talsverður samdráttur í öðrum smærri kvótategundum. Meðal annars minnkar úthlutaður kvóti í hlýra og skötusel um helming. Einnig er minni úthlutun á tegundum eins og blálöngu og litla karfa. „Úthlutað aflamark er alls um 440 þúsund tonn í hinum ýmsu kvótategundum sem er um 11 þúsund tonnum minna en á fyrra ári.“

Mikil fækkun skipa

Þá segir á vef stofnunarinnar að alls fái 466 skip úthlutað aflamark samanborið við 540 á fyrra fiskveiðiári. „Skýringin á þessari miklu fækkun liggur í því að fjöldi skipa fékk úthlutað hlutdeildum í hlýra á grundvelli veiðireynslu í fyrra. Það hafði í för með sér mikla dreifingu á veiðiheimildum í litlum stofni á meðal skipa með engar aðrar hlutdeildir. Síðan þá hafa hlutdeildirnar í hlýra safnast á færri hendur.“

Það skip sem fær úthlutað mest aflamark er Sólberg ÓF 1, en það fær 10.354 þorskígildistonn eða 2,8% af úthlutuðum þorskígildum.

Brim fær mest

„Fimmtíu stærstu fyrirtækin fá úthlutað sem nemur um 89,2% af því aflamarki sem úthlutað er og er það svipað hlutfall og í fyrra,“ segir á vef Fiskistofu. Er þar bent á að alls fá 336 fyrirtæki eða lögaðilar úthlutað sem er 80 aðilum færri en í fyrra. Bent er á að í fyrra varð mikil fjöldun vegna kvótasetningar á hlýra.

Brim (áður HB Grandi) fær mest úthlutað eða sem nemur 9,4% af heildinni. Samherji fær 6,6% í sinn hlut, FISK Seafood 6% og Þorbjörn hf. 5,5%.

mbl.is/Árni Sæberg

Reykjavík úr fyrsta í þriðja

Ef skoðuð er úthlutun miðað við heimahöfn eru það skip með heimahöfn í Vestmannaeyjum sem fá mest eða sem nemur 11,4% samanborið við 10,6% í fyrra. Næstmest fer nú til Grindavíkur, eða 10,9% af heildinni samanborið við 11,0% á fyrra ári.

Á vef Fiskistofu er bent á að til fjölda ára hefur Reykjavík verið sú höfn sem mestu aflamarki er úthlutað til. Nú fellur hins vegar Reykjavík úr fyrsta sæti í það þriðja með 10,6% miðað við 11,6%.

Fiskistofa tekur sérstaklega fram að aflamarki í deilistofnum verði úthlutað síðar á árinu og ekki sé óalgengt að aukið sé við aflamark í uppsjávarfiski.

• Blogga um frétt