„Þetta getur ekki verið betra“

Það hefur hægst mikið á makrílveiðinni í Smugunni og leita nú skipin að makríl við erfiðar aðstæður, segir á vef Síldarvinnslunnar. Í gær var lokið við að landa 800 tonnum úr Bjarna Ólafssyni AK í Neskaupstað og kom Börkur NK með 860 tonn í gærkvöldi sem verið er að vinna. Einnig er Hákon EA að landa fullfermi af frosnum makríl.

Þá segir að Bjarni Ólafsson hafi lagt úr höfn að löndun lokinni og var honum ætlað að veiða síld austur af landinu. „Þær fréttir bárust síðan í morgun að skipið hefði tekið eitt stutt hol og fengið hvorki meira né minna en 800 tonn,“ segir á vef Síldarvinnslunnar.

„Við fengum þetta norðan í Glettinganesgrunni og það var einungis dregið í rúman klukkutíma. Það er óhemja af síld hérna. Þetta hol gaf 800 tonn og ég man ekki eftir að hafa fengið svona mikið í holi þegar dregið er í svona stuttan tíma. Þetta hol var fyrsta holið með nýju trolli frá Hampiðjunni og það reyndist svo sannarlega vel,“ er haft eftir Gísla Runólfssyni skipstjóra.

„Þetta er stór og falleg síld og hún ætti að henta ágætlega til vinnslu. Við þetta bætist að veiðisvæðið er einungis í þriggja klukkustunda siglingarfjarlægð frá Norðfirði. Þetta getur ekki verið betra.“

• Blogga um frétt