Skoða tengsl hnúfubaka og loðnustofnsins

Í síðustu viku voru sjö hnúfubakar í Arnarfirði merktir. Merkingarnar tókust vel og hafa borist upplýsingar um ferðir sex dýranna, að því er fram kemur á vef Hafrannsóknastofnunar. Þar segir að hvalirnir hafi haldið sig innan Arnarfjarðar og ferðast talsvert innan fjarðarins á þeim fjórum dögum sem liðnir eru frá merkingu.

Fram kemur að hnúfubak hafi fjölgað mikið við Ísland á síðustu áratugum og er tegundin hér við land í meira mæli að vetrarlagi en aðrar tegundir skíðishvala.

„Talsverður fjöldi hnúfubaka hefur sést á loðnumiðum á veturna og virðast þeir fylgja loðnugögnum að einhverju marki, þótt hluti stofnsins fari á æxlunarstöðvar í Karíbahafi og við Grænhöfðaeyjar á veturna.“

Margt óvitað

Margt er óvitað um ferðir hnúfubaka og „hugsanleg tengsl þeirra við loðnustofninn og er merkingunum m.a. ætlað að varpa ljósi á þessi tengsl“. Fylgst er með ferðum þeirra eftir að gervitunglasendum er komið fyrir á baki hvalanna með loftbyssu sem er sérhönnuð til slíkra merkinga.

„Auk merkinganna eru tekin lífsýni af hnúfubökunum, en greining ísótópa í slíkum sýnum getur gefið vísbendingar um fæðusamsetningu hnúfubaks hér við land sem er nánast óþekkt,“ segir á vef stofnunarinnar og er bent á að stefnt sé að því að merkja fleiri hnúfubaka í loðnuleiðangri sem hefst í lok september.

Gervitunglasendum komið fyrir á baki hnúfubaka með loftbyssu. Ljósmynd/Hafrannsóknarstofnun

• Blogga um frétt