Þurfti aðstoð vegna vélarbilunar

Þegar varðskipið Þór var í nágrenni Þorlákshafnar á fimmta tímanum í dag hafði handfærabátur, sem var á leið til Þorlákshafnar, samband og óskaði eftir aðstoð vegna vélarbilunar. Varðskipið var þá nýbúið að mæta bátnum sem var á innleið til Þorlákshafnar.

Áhöfn varðskipsins brást skjótt við og léttbátur varðskipsins var sjósettur einungis þremur mínútum eftir að hjálparbeiðnin barst, að því er segir í tilkynningu frá Landhelgisgæslunni.

Handfærabáturinn var dreginn af léttbát varðskipsins til Þorlákshafnar en þangað var komið laust eftir klukkan fimm. Um fimmtíu mínútum eftir að hjálparbeiðnin barst varðskipsmönnum voru léttbáturinn og áhöfnin komin aftur um borð í varðskipið Þór.

Blíðviðri var á staðnum, nánast logn og ládauður sjór.

• Blogga um frétt