Tafir hjá Dettifossi vegna COVID-prófa

Dettifoss, nýtt skip Eimskips, kom til landsins í gær eftir 68 daga siglingu frá skipasmíðastöð í Kína. Upphaflega var gert ráð fyrir að það héldi nokkrum klukkutímum síðar í sína fyrstu ferð úr landi, og stefnan sett á Nuuk í Grænlandi. Einhverjar tafir urðu þó á brottförinni og hún er nú áætluð klukkan 19:59 í kvöld.

Edda Rut Björnsdóttir, markaðsfulltrúi Eimskips, segir að tafirnar hafi komið til vegna þess að skipverjar þurftu að fara í skimun vegna kórónuveirunnar og bíða eftir niðurstöðu. Hún sé nú komin og öll sýni neikvæð.

Bragi Björgvinsson, skipstjóri Dettifoss, segir í samtali við mbl.is að ekkert sérstakt hafi komið upp á. „Við erum bara að græja ýmislegt og stússa, en förum að verða klárir hvað úr hverju.“

Fimmtán manns eru í áhöfn skipsins, en um helmingur hennar var einnig í áhöfn á leiðinni frá Kína. Þeir sem halda förinni áfram til Grænlands áttu ekki að koma í land af sóttvarnaástæðum og því óljóst hví skipverjar þurftu að fara í skimun.

Nýr Dettifoss var smíðaður í Taicang í Kína, en hann er stærsta skip sem hef­ur verið í þjón­ustu ís­lensks skipa­fé­lags. Vegur skipið 26.500 brúttótonn og getur tekið 2.150 gámaeiningar.

Fréttin hefur verið uppfærð

• Blogga um frétt