Blautklútar og dömubindi í trollið

Mikið magn hreinlætisvara hefur skilað sér í troll leiðangursmanna á grunnslóðalangri Hafrannsóknarstofnunar sem nú stendur yfir. Blautklútar, dömubindi, eyrnapinnar, latexhanskar og ýmsar umbúðir hafa læðst með ýmsum flatfiskategundum sem stofnunin rannsakar.

Markmið leiðangurs Hafrannsóknarstofnunar er stofnmæling á flatfiskum og sandsíli en að þessu sinni er einnig fylgst með þéttleika sæbjúgna. Á vef stofnunarinnar kemur fram að „óskemmtilegur meðafli“ hafi læðst með um borð.

Blautklútaklumpur úr togi á grunnslóðaleiðangri við Akranes. Ljósmynd/Hafrannsóknarstofnun

„Blautklútar fundust í flestum togum í Grunnslóðarleiðangri við flóann en mest var magnið við Akranes og við minni Borgarfjarðar, eða tæp 2 kg við Akranes og rúmt kg í Borgarfirði. Auk blautklútanna „veiddust“ ýmsar aðrar hreinlætisvörur, eins og dömubindi, eyrnapinnar, latexhanskar og umbúðir sem eiga líklega rætur að rekja til skólps. Hafrannsóknastofnun hefur ekki skráð hreinlætisvörur til „tegunda“ í leiðöngrum sínum en það er upplifun leiðangursmanna að magn hreinlætisvara sé mun meira í ár en árin á undan.

Við viljum því hvetja fólk til að passa sig að henda þessum hlutum í ruslið, en ekki sturta þeim niður, því að jafnvel þó að pakninginn segi að klútarnir séu niðursturtanlegir, þýðir það ekki að þeir brotni hratt niður í náttúrunni,“ segir á vef Hafró.

• Blogga um frétt