Gísli lætur af formennsku í Hafnarsambandinu

Ársþing Hafnasambands Íslands hófst klukkan níu í morgun. Í fyrsta skipti í rúmlega 50 ára sögu sambandsins er þingið rafrænt.

Á þinginu verða lagðar fram og ræddar þrjár tillögur, um orkuskipti í höfnum, fyrirhugaðar breytingar á hafnalögum og hugmyndir um breytingar á vigtarreglugerð.

Á þinginu mun Gísli Gíslason, fyrrverandi hafnarstjóri Faxaflóahafna, láta af formennsku í Hafnasambandinu. Gísli hefur verið hafnarstjóri frá árinu 1987. Fyrst á Akranesi sem bæjar- og hafnarstjóri, en frá árinu 2005 sem hafnarstjóri Faxaflóahafna. Hann lét af því starfi síðsumars. Þessum starfstitli fylgdi þátttaka í starfi hafnasambandsins – fyrst Hafnasambands sveitarfélaga og síðar Hafnasambands Íslands. Þar var hann varamaður í stjórn frá 1987-1994, en í stjórn frá 1994-2004 og síðan formaður stjórnar frá þeim tíma til þessa fundar.

Gísli segir að nú skilji leiðir eftir langa og afar skemmtilega og ánægjulega vinnu að málefnum hafnanna. „En því miður gerist það á fundi þar sem ekki er tækifæri til fallegrar samveru með tilheyrandi og hefðbundinni gleðistund.“

Kjörnefnd mun á þinginu í dag gera tillögu um að Lúðvík Geirsson, hafnarstjóri í Hafnarfirði, taki við formennsku af Gísla. Hafnasambandsþingið átti að fara fram dagana 24.-25. september sl. í Snæfellsbæ en því varð að fresta vegna heimsfaraldursins. Í staðinn verður þingið 2022 haldið þar.