Björg aflahæst meðal skipa Samherja

Skip Samherja komu með 39.061 tonn að landi á síðasta ári og nam aflaverðmætið 10,5 milljörðum króna. Meginuppistaðan í afla skipanna var þorskur en einnig voru ýsa, ufsi og gullkarfi í heildaraflatölunni auk annarra tegunda, að því er fram kemur á vef Samherja.

Það var Björg EA 7 sem var aflahæst á síðasta ári en skipið kom með 9.443 tonn að landi. Á eftir fylgdi Kaldbakur EA 1 með 9.377 tonn og svo Björgúlfur EA 312 með 9.001 tonn. Þá var Björgvin EA 311 í fjórða sæti með 7.062 tonn og Harðbakur og leiguskip, sem voru ekki við veiðar allt árið, voru með samtals 4.178 tonn upp úr sjó.

Margrét EA var með mesta aflaverðmætið. mbl.is/Þorgeir

Röðun skipanna breytist nokkuð er raðað er eftir aflaverðmætum og er það uppsjávarskipið Margrét EA 710 sem náði fyrsta sæti með 2.062 milljóna aflaverðmæti. Næstu skip fylgja þétt á eftir og nam aflaverðmæti Kaldbaks 2.023 milljónum króna en hann deilir öðru sæti með Björgu. Björgúlfur fylgir síðan með 1.915 milljónir króna, svo Björgvin með 1.492 milljónir og síðan Harðbakur og leigð skip með 1.032 milljónir.

Bolfiskafli skipa Samherja. Mynd/Samherji

Aflaverðmæti skipa Samherja. Mynd/Samherji

• Blogga um frétt