Mesti hagnaður í 250 ára sögu Royal Greenland

Grænlenska ríkisútgerðin Royal Greenland skilaði á síðasta ári mesta hagnaði í 250 ára sögu félagsins og nam hagnaður af rekstri 326 milljónir danskra króna, jafnvirði 6,8 milljarða íslenskra króna. Árið 2020 skilaði samstæðan tapi sem nam 57 milljónum danskra króna.

Fram kemur í tilkynningu á vef fyrirtækisins að velta hafi aukist um 16% og nam hún 5,64 milljörðum danskra króna í fyrra, jafnvirði tæplega hundrað milljörðum íslenskra króna.

„Snemma árs 2020 tók Royal Greenland A/S mikilvæga ákvörðun um að halda áfram veiðum, löndun, framleiðslu og sölu í jafn miklu umfangi og upphaflega var áætlað, þrátt fyrir áskoranir heimsfaraldursins. Þessi ákvörðun tryggði að samstæðan fór inn í 2021 fullmönnuð bæði á landi og á landi, með núverandi birgðir og með áframhaldandi sterkum tengslum við birgja og viðskiptavini um allan heim,“ segir Mikael Thinghuus, forstjóri Royal Greenland, í tilkynningunni. Hann lætur af störfum í sumar.

Frétt af mbl.is

Forstjóri Royal Greenland lætur af störfum

Stofnað 1774

Um er að ræða gríðarlegan viðsnúning hjá fyrirtækinu sem fyrir 13 árum þurfti björgunarpakka upp á 500 milljónir danskra króna vegna veikrar fjárhagsstöðu.

Royal Greenland er arftaki dönsku einokunarverslunarinnar á Grænlandi og var henni stýrt í gegnum verslunarfélag konungs, Den Kongelige Grønlandske Handel, sem stofnað var 1774. Einokunarversluninni var aflétt 1950, en það var ekki fyrr en 1986 sem eignarhald félagsins var veitt gænlensku heimastjórninni. Árið 1990 var síðan sá hluti verslunarfélagsins sem snéri að sjávarútvegi færður undir merki Royal Greenland A/S.

• Blogga um frétt