Drónanum skilað og tvær kærur á borði lögreglu
Setja bókamerki
Dróna svissnesku fjölmiðlamannanna hefur verið skilað til lögreglu, eftir að starfsmenn Hvals höfðu tekið hann í sínar vörslur og neitað að láta af hendi.
Þetta staðfestir Ásmundur Kr. Ásmundsson yfirlögregluþjónn á Vesturlandi. Drónanum var skilað um helgina.
„Við vorum komin með úrskurð sem heimilaði okkur að fara og sækja tækið, en starfsfólkið afhenti tækið áður en við þurftum að ráðast þangað inn, sem var farsæl lausn.“
Málinu hvergi nærri lokið
Dróninn er nú kominn til eigenda sinna og þeir farnir af landi brott. Málinu er þó hvergi nærri lokið, að sögn Ásmundar.
Bæði Hvalur og fjölmiðlamennirnir lögðu fram kæru og nú fer fram rannsókn á málinu innan rannsóknardeildar lögreglunnar á Vesturlandi.
Svo fer málið til saksóknara sem tekur ákvörðun um framhaldið í hvoru máli fyrir sig.
Þurftu leyfi Hvals til þess að fara nær en 150 metra
„Þegar einhver tekur hlut er það flokkað sem gripdeild eða þjófnaður. Þarna er tæki tekið en það er auðvitað á víðavangi og á landi Hvals ehf. Hvalur hefur kært drónaflugið og svo auðvitað hefur fjölmiðillinn kært það að þeir tóku tækið.“
Ásmundur segir drónaflug vera vaxandi vandamál. Lögreglan sé til að mynda farin að fá tilkynningar um drónaflug inni í sumarbústaðabyggðum.
„Reglur Samgöngustofu eru alveg skýrar með drónaflug. Í Hvalfirði hefði þetta átt að vera 150 metrar út frá hliðum og svo mega þeir ekki fara ofar en 120 metra. Þannig hefði dróninn ekki mátt fara nær athafnasvæði Hvals en 150 metra, nema þá með sérstöku leyfi Hvals ehf.“
Tveir í haldi grunaðir um mansal og smygl á fólki
Vangaveltur gengu lengra en innistæða var fyrir
Átta til tólf erlendir glæpahópar
Rannsóknin skýrist með hverjum degi
Óvenjuleg tilkynning: 19 í gæsluvarðhaldi
Búið að fella björninn
Einróma stuðningur við virkjanir